التاج ده جالي من دوحه....مشاعر دافئه
والمفروض كنت ارد عليه بدري عن كده بس كان عندي امتحانات
نتبدي بقى..حاسه اني بمتحن تاني
بسم الله الرحمن الرحيم...السؤال الاول
اختار اى عصر من عصور مصر تعيش فيه وفى عهد اى حاكم واشمعنى؟
العصر الي عايشه فيه لاني مش عارفه لو اخترت عصر تاني هكون فيه ازاي لو قولت اختار عصر سيدنا محمد صلى الله عليه وسلم مش يمكن مكونش مسلمة لو اخترت مثلا اي عصر تاني مش يمكن مكنش قابلت اعز واغلى اصدقاء في حياتي وبعدين احنا بنتكلم في ايه هو في حد بايده يختار العصر والمكان الي هيتولد فيه ويعيش فيه
اول اولويه فى حياتك عيلتك ولا شغلك ولا اصحابك؟
مش عارفه والله انا بقضي اكتر الوقت مع اصحابي لان طبعا مع بعض في الجامعه طول اليوم او لما كنا بنشتغل كنا برده على طول مع بعض يعني بنروح بيتنا ننام او نكمل كلام على النت او في التليفون
بس من ناحية الاولويه مش عارفه بجد مقدرش استغنى عنهم التلاته اصحابي عيلتي شغلي مستقبلا
ايه اكتر حاجه بتحبها فى رمضان؟
اكتر حاجة اني بصلي قيام الليل اكتر من الايام العاديه
اوصف اجمل افطار ممكن تفطره؟
اي حاجه بحبها انا مش اكيله اوي يعني مش بدق في حكايه الاكل اي حاجه
لو انت حاكم على مجموعه هتكون عادل؟ وهتتاكد ازاى انك حاكم عادل؟
لا حاكم ايه دي مسؤليه جامده جدا وبعدين الحكام اول ناس بيتحاسبوا يوم القيامة وكمان هتسال على كل واحد لا حرام مش عاوزة
ايه اللى بيبوظ الحكام ،نفسهم ولا الشعب ولا الحاشيه المقربه؟
الشيطان هههههههههههههه
اكتر اعلامى مصرى بتحترمه؟
وائل الابراشي منى الشاذلي منى الحسيني وطبعا الاعلاميه الكبيرة لبنى غانم ههههههههههههههههه
لو ممكن تشتغل شغلانه تانيه كنت تحب تشتغل ايه؟
هشتغل نفسي هههههه هوانا اشتغل اولاني لما اشتغل تاني
ايه اكتر بلد تحب تعيش فيها بعد مصر؟
بلد تانية احب عيش فيها غير مصر تبقى مصر برده
اوصف ترتيبات اجمل فرح ممكن تحضره؟
فرحي يعني ولا اي فرح
ماعلينا لو فرحي احب انه يكون بسيط جدا تكون الاغاني الي فيه جميله ولازم تكون في اغنيه لفيروز ولمنير ومتقوليش ازاي في اغاني ليهم تنفع تتغنى في الفرح واغاني مطربين تانيني تكون جميله ولو اغنية سعد الصغير اتغنت هولع في الفرح
واهم حاجة هعزم كل اصحابي والبلوجرية طبعا معزومين
الفرح انشاء الله الساعة7 في شهر سبعه 2017 ولو حد عنده فرح تاني في نفس المعاد بيقىاجل الفرح ل 2027اي خدمة يا جماعه
بتراعى كلام الناس والقيل والقال ؟لو ايوه او لاء قول ليه؟
والله الي يقول يقول مادمت راضيه عن نفسى ومش بعمل حاجة غلط وبراعي ربنا ميهمنيش حد والناس عمرها ما هتتغير
هو صحيح بضايق اما حد يتكلم عليا من ورايا بس ربنا يحاسبهم
والموقف ده حصلي لما واحدة مقدرش اقول صحبتي لانها مقدرتش توصل للمرحلة دي معايا كانت مجرد زميله بنروح ونيجي مع بعض الجامعه كنت بديها محاضراتي والتلخيص بتاعي وفي الاخر قالت علي لو حدة بقت اعز اصحابي دلوقتي اني مش بحب غير نفسي اتصدمت جدا انها قالت كده بس كانت عادي لانها زي مقولتلكم مجرده زميله والحمد لله هبه لما عرفتني قالتلي انتي اطيب انسانه شوفتها وبتحبي كل الناس وده بجد اسعدني اوي وانا من هذا البلوج والبوست بالتحديد قول لهبهوب انتي الي اطيب وارق هبه وانا بحبك جدا
صحيت من النوم ملقيتش الموبايل ولا الكاميرا الديجيتال ولا الكمبيوتر ورجعنا لعصر الحمام الزاجل والاحصنه هتكون سعيد؟
لا هكون سعديه هههههههه
مش يمكن ملقنيش انا كمان
بس لو حصل كده هكون زعلانه اوي يعني لما اعوز اكلم حد من اصحابي ابعتله رساله في رجل الحمامه واقف على السطح استناها ويمكن حد يصطادها يبقى اعمل ايه ساعتها يبقى اخطف رجلي وارحلهم اسهل
السعاده هى ؟
اني اكون راضيه عن نفسي وماما وبابا راضين عني وطبعا ربنا في الاول والاخر
عندك امل؟اسبابك؟
الحمد لله عندي امل واماني واحلام ولا كان جرالي حاجه
اسبابي انه مؤمنة بربنا وعارفه انه مش هيجيب حاجة وحشه
حتى لو انا مش راضيه عن الحاجة دي بحمد ربنا برده يعني وعسى ان تكرهوا شيئا وهو خير لكم
لما تحب تهرب من كل شئ بتروح فين؟
بنام بس للاسف مش حل لان الي بهرب منه بشوفه في الحلم وده اتكلمت عنه في المقال الي هينزل في مجله على صوتك ان شاء الله عدد فبراير
امتى اول مره خت نفس طويل وقلت ياه انا فعلا كبرت؟
اول مانزلت موضوعاتي في الجريده وبابا فرح اوي واخد الجرنال يوريه لاصحابه ساعتاه مقولتش انا كبرت قولت انا انتصرت ايوة انتصرت بس لسه الحرب مش خلصت ادعولي المعركه مازلت مستمرة
بتشرب سجاير؟ وايه شعورك لما تلاقى ست او راجل بيشرب سجاير؟
سجاير ايه السجاير دي للمبتدئين انا بشرب بانجوا ههههه
خلاص هتكلم جد حاسه ان في حد بيقول بطلي هزار
انا مش بحب الراجل الي بيشرب سجاير
والست برده مش بحبها ولا بحترمها
الله فكرتني بموقف كان فيست بتشرب شيشه وعرفت ان بنتها هي كمان بتشرب فقالت للبت الشيشه دي سر بيني وبينك اوعي بابا يعرف يعني عليه الراجل تلاقيه تاجر مخدرات ومخبي عليهم ههههههه
بتعرف ايدك اليمين من الشمال ازاى؟
هههههههههه دا دي ليها حكايه انا عندي وحمة في ايدي اليمين كانت كل ما المدرسة تقول ارفعوا ادكوا اليمن كنت اتلخبط اقوم ابص للوحمه اعرف ان دي ادي اليمين وارفعها والله تصدقوا حتى بعد ما كبرت سا عات بتلخبط لما كون في مكان معرفوش وحد يقولي على ايدك اليمين الحمد لله اني عندي وحمة هي البوصله بتاعتي
فى رايك ليه الذوق والنخوه انعدموا؟
والله معرف هي عدوى وانتشرت بس في ناس لسه عندها ذوق ونخوة لسه في وجود ليه تبقى مصيبه لو انعدمت
ايه الحاجه اللى لو حصلت تبقى سعيد قوى؟
بصوا الانسان طماع
انا نفسي احقق ذاتي واشتغل واكون ناجحه فيي حياتي ونفسي اكون ديما مع اصحابي
وكمان في حاجة بس
عايز يبقى عندك ارض زراعيه ولا اجنس عربيات ولا كام عماره ولا فلوس فى البنك؟
لا فلوس هعمل ايه بالارض او اجنس العربيات ياريت فلوس عشان افتح جرنال وبسمة تبقى رئيسه التحرير واشغل اصحابي فيه وكمان اعمل فيكم معروف اقصد البلوجريه يعني واشغلكم فيه بدل يعيني البهدله دي من مدونه لمدونة
وهمعل قناه لنفسي وابقى المعدة والمذيعة والمخرجه والمتفرجه ومتزعلوش لو حد عاوز يشتغل هشغله بس قولوا يارب مليون ولا اتنين ينزلوا عليا من السما كده
البحر ولا النيل؟
البحر بحبه كنت بعد على الشاطىء واسمع فيروز شايف البحر شو كبير
النيل بحب ابصله من بعيد لان كل ماقربت لك ما اكتشفت وحاشة المنظر
وانا جايه او راحة الجامعه بحب ابصله المنظر جميل جدا سما زرقا وميه صافيه طبعا من بعيد باين كده والشجر والزرع بيقى منظر جميل اوي
مركب ولا طياره؟
للاسف مش جربت الاتنين
مجنون ولا عاقل؟
انتوا شايفين ايه
تقرا كتاب ولا تتفرج على فيلم؟
يعني علىى حسب الفيلم او الكتاب يعني النهارد يعني مثلا لو الكتاب جذبني مقدرش اقوم واتفرج على حاجة زي النهارده اعدت اقرا كتاب مذكرات شابه غاضبه وكان الاكل هيشيط على البوتجاز بس ربنا ستر محصلش حاجه
تمرر التاج لمين؟
جميله بوحريد
دوده
محمد الملاح
وكل البوجريه الي في السيد بار عندي يجوبوا عليه
وكل الي يشرفني بالزيارة
