Sunday, November 21, 2010

ينفع أقولك




هو أنا ينفع أقولك إني بحبك ..من غير ما تضايقي وتتعصبي
وتقوليلي  إنك مش بتفكري في الارتباط دلوقتي ..
وأنك بقيتي تستخسري نفسك في أي راجل والكلام ده كله ..
ممكن تسمعيني مره واحده أكمل فيها كلامي
 ومتقاطعنيش وتكلمي في موضوع تاني خالص  غير إللي بكلمك فيه..
ممكن تديني فرصه أقولك كل اللي في قلبي..
 أقولك بحس بأيه وأنا معاكي وبحس بأيه وأنا مش معاكي ..
ممكن تبصيلي ومتحطيش وشك ف الارض كده ..
تعرفي أنتي فعلا مفيش راجل يستاهلك ..
عارفه ليه؟..
لأنك نجمه من السما ..
من حظ الأرض إنها نزلت عليها..
 ومن تعاستي وسوء حظي إني مش قادر ألمسها وهي جنبي ..
أنا مش هقولك لو محستيش بحبي ليكي إني هضيع من غيرك
وهموت نفسي لأني مش هعمل كده ..
عارفه.. ليه لان حبي ليك زود ايماني

بس ع الاقل لو محبتنيش هاتيلي واحده ليها نفسك إسمك
 ونفس ملامحك
 ويكون شعرها لون شعرك
 إللي  باين منه خصله من طرف طرحكتك بتعاكس رموش عنيكي ..
 هاتيلي واحده ليها نفس خجلك ورقتك..
 هاتيلي واحده ليها نفس فرحك ونفس حزنك هاتيلي واحده زيك ..

بس عارفه..
 مهما دورتي مش هتلاقي  واحده زيك ..
لأن أنتِ ِواحده بس ملهاش زي ..
أنتِ الضي إلي بينور ضلمتي ..
يعني لما قولك كل شوية منوره ..متتعصبيش اوي كده وتقوليلي بطل افوره
كان نفسي تفهمي انك فعلا منوره

عارفه قد إيه ببقى مبسوط  أوي لما تيجي تحكيلي كل حاجه بتحصلك
 بفضل أسمعك ومش عاوز أسمع حد غيرك
 لو تليفوني رن بقفله عشان أفضل أسمعك إنتي بس..
عارفه قد ايه قلبي بيوجعني لما تقوليلى إني أحسن صديق ليكي في الدنيا ديا ..
عارفه قد إيه بحس إني روحي بتروح مني لما تجيلي زعلانه ومضايقه
 وتحكيلي إنه زعلك وضايقك..
 كان بيبقى نفسي اشوفه مره واحده اكسرلك فيها دماغه عشان خلاكي تدمعي..
 ولما أتعصب وأقولك إني أنتي إزاي تحبي واحد كده؟؟..
 ده مريض نفسي يا بنتي ..
تزعلي مني وتترفزي وتسيبني وتمشي ..
كنت بقولك كده عشان كنت خايف عليكي أوي..
 لاني بحبك أوي ومحبش أشوفك زعلانه ولا بتبكي ..
كتير كنت بتحرق قدامك وإنتي مش حاسه بيا ...
كم مره كنت هقولك فيها كفايه بقى ..
فوقي من وهم حبك ليه..
 وأسكت ومقدرش أقول حاجه..
 لما ألاقيكي جايه فرحانه  ووشك منور عشان كلمك أو بعتلك مسدج حلوه ..
كنت برسم على وشي إبتسامه أداري بيها النار إللي بتحرقني ..
وأقول لنفسي أزاي قدر بسهوله كده ياخدها مني؟؟  ..
عرفته إمتى  ده.. وإزاي تثق فيه كده ؟؟..
وكل لما بشوف في عنيكي الفرحه بخاف أوي يجرحك ..                                           
ولما جتيلي  بتعيطي وتقوليلي إنه سابك..
 حسيت إني إتوجعت أوي عشانك
وأنا شايف دموعك نازله من عيونك زي المطر
كان نفسي أخدك ساعتها في حضني ومقدرتش
 صدقيني لسه قلبي موجوع عشانك
عشان بعد كل ده لسه مش قادره تنسيه..
هتفضلي حاطه وشك في الارض كده كتير؟..
ممكن ترفعي وشك ومتحطيش راسك ف الارض تاني ..
عشان خاطري متعيطتيش ..
إيه يعني أنا حبيتك وإنتي محبتنيش ..
عادي
مش انا اول ولا اخر واحد يحبك وانتي متحبهوش

بس تعرفي أنا متأكد إني صديقك الوحيد وحبيبك الوحيد ..
عارف إني لو مت ولا جرالي حاجه مش هتقدري تكملي حياتك من غيري

مش عارف ليه بحس  ديما إنك مش بس حبيتي وصديقتي بحس إنك بنتي ..
البنوته الشقيه اللي مهما عملت بسامحها ..
واللي مقدرش أبدا على زعلها ..

بحبك ..وهفضل احبك طول عمري ..
ومش بإيدي على فكره ..
نصيبي  احبك بقى هعمل ايه..

أنا خلصت كلامي ..

إرفعي راسك بقى وكفايه دموع ..
قلبي مش مستحمل وجع
عشان خاطري مدمعيش


على الهامش...

شو ذنبي اذا بتهواني وانا محتاره ..محتاره بهواك ..شو ذنبي ما رماني الهوى ياللي رماك ..وشو ذنب الهوى لو ما جمعنا سوى ..يمكن هواك هوى تاني..ااااااه شو هواك