Thursday, December 27, 2012

لسه مش عارف أنا مين ؟





أنا بكره وأنا امبارح
وأنا الأمل إللي طارح جوه عيونك ضي
يمحي يأس سنين  وجرح ماضي راح مش جي
أنا فجر ليل حزين شقشق عشان خاطر
عيونك الدبلانين
أنا الوردة إلي نداها دمعك
وفراشة نايمه على كتفك
ولسه مش عارف أنا مين
أنا حب سنين طوال كنت عايشهم ف الخيال
أنا الشمس اللي طله من شباكك تاخدك بالأحضان
تسيح التلج اللي جمد ضلوعك وتدفي قلبك البردان
أنا حاجات كتير أوي منك أنا إلي بحبك وشايله همك
أنا صديقتك وحبيبتك وأمك
أنا حضن دافي تنده يضمك ينسيك كل إلي فات

 لبنى غانم

Monday, December 17, 2012

ندوة كتاب "صندوق ورق" باستضافة المجلس الأعلى للثقافة




تحت رعاية
الدكتور/ سعيد توفيق امين عام المجلس الاعلى للثقافة تعقد لجنة القصة ندواتها تحت سلسلة ندوات شهرية بعنوان " تـــــــــــواصــــــــل" وذلك فى تمام الساعة السادسة مساء الأربعاء 19/12/2012بقاعة المؤتمرات بالمجلس الاعلى للثقافة .

ندوة تناقش تجربة النشر الجماعى لكتاب و اقلام المبدعين الشباب .. فى تجربة نشر كتاب ( صندوق ورق ) و الحديث عن التجربة و فكرتها و كيفية تحقيقها و يقدم التجربة كل من
الكاتب / خالد ناجى
والكاتب / محمد امام
والكاتبة / شروق الهامى
و الكاتبة / غادة محسن
و الكاتبة/ حورية محمد

وتدير الندوة الكاتبة الدكتورة / عزة بدر عضو لجنة القصة

نتشرف بحضوركم .. :)
الدعوة عـــــــــــــــــامة و الحــــــــــــضور مجاني


https://www.facebook.com/events/231201367011631/

Monday, November 05, 2012

دوامة





زحمة أفكار ونسمة هوا باردة قادرة تجمد كياني

والمكان بيوسع أوي رغم الزحمة اللي في دماغي

بيوسع وعمقه بيزيد وأتنهد وأفكر وأفكر وأفكر

وفي الآخر بغرق في التنهيد

وبحس إني طفل وحيد محتاج أوي لحضنك
............

أحضني يمكن أحس بحبة دفا

يمكن ابكي أوي ودموع عنيا تبكي عنيك

يمكن أحس ساعتها بحبي ليك

يمكن أحس إن المكان بقى أضيق

واني خلاص مش هغرق

وان أنت شط النجاة

وان الحياة من غيرك مش حياه

...................

طب أقولك حل تاني سيبني اغرق

أو سيبني أحاول أنقذ نفسي واهرب

سيبني وابعد

ولا أقولك قرب اكتر

أنا قلبي مش بيقدر

بسهوله يبعد

ولا عقلي رغم البعد

هيبطل يفكر

.....

أقولك آخر حل

أنا مليش حل... اخطفني واهرب

 
لبنى غانم 

Monday, April 02, 2012

قلبه مبقاش وحيد




عنيها بكت لما حكى لها حكايته الأليمة
عن ليالي السهر وقصة الحب القديمة
عن بنت كانت كل حياته وأصبح ملهاش قيمه
مسح دموع عينيها وابتسم :)
أخيرًا لقى قلب يشاركه الألم!!
قالها نكته ضحكتها مع إنها بايخه وقديمه
خد قلبها النونو على كفوفه
 طبطب عليه وحضنه
وأبدى اعتذاره وندمه انه بكى عنيها الحلوين
وقرر بينه وبين نفسه
 ما يفتحش تاني صناديقه القديمة
يوميها نام مرتاح
وأتمنى بكره لما يقابلها تقبل دعوته ع السيما

لبنى غانم

Friday, February 10, 2012

يعني إيه تكوني صاحبة العروسة




يعني إيه تكوني صاحبة العروسة:
يعني أنتي معاها من أول ما بتيجي تاخد رأيك في الإنسان إلي اختارته يكون شريك حياتها
عشان لو الإنسان ده وحش أنتي أول  حد هيقولها بلاش وغصب عنها هتسمع كلامك لأنها واثقة انك عندك حق ولو كويس أنتِ أول حد هتباركيلها وتفرحيلها من قلبك أنها اخيرًا اختارت صح
يعني أنتي الي هيطلع عينك معاها في اللف على المحلات عشان تختار فستان الخطوبة ومتقدريش تقوللها انك تعبانه دي برده صحبتك يعني في داهية صحتك
واتعودي على كده بقى من يوم الخطوبة لحد ما تتجوز وهاتك بقى يا مشواير ولف على المحلات و الكوافيرات وااااااااااه يا رجلي يا انا
يعني بعد الخطوبة تقلعيها الدبله وتلبسيها انتي وتقوللها إيه رأيك بذمتك مش حلوه في أيدي J طبعا صاحبة العروسة لازم تباركلها الدبله الله مش أصحاب برده يا ناس
يعني أتعودي بقى أن تليفونها ديما مشغول  مش فضايلك يا حبيتي خلاص من لاقى أحبابه نسي أصحابه ومن فضلك اعد الاتصال في وقت لاحق
يعني انتي الي هتديها على دماغها لو لاقيتها غلطانه في حق خطيبها وسايقه فيها ومصره انه هو إلي غلطان تقوم تتقمص منك وتقولك هو أنا مش صاحبتك لازم تقفي ف صفي ..وعشان تقفي في صفها صح بقى تقومي بالمخده وعلى دماغها على طول تقوم تعقل ووتتصل بيه تعتذرله..هما دول الأصحاب ولا بلاش :D
يعني يوم فرحها انتي إلي واقفة جنبها وانتي إلي بتظبطيلها فستانها وأنتي إلي قاعدة  معاها في الكوافير بتوصي الكوافيره متخليش الميكب اوفر ويكون رقيق زيها
وانت الي معاها لحد ما  توصل قاعة الفرح، فرحانة لدرجة إن عيونك تدمع من الفرحة ،صحبتي بتتجوز يا ناس
صاحبة العروسة يعني حضن دافي كبير بتحضنه لصحبتها  وبتتمنالها السعادة
صاحبة العروسة متهداش الي ما توصي جوز صحبتها انه ياخد باله منها ،يقوم يقول بكل رخامه متخافيش انا اكتر حد يخاف عليها ..(يسلام يا اخويا انا بخاف عليها اكتر منك من قبل ما تعرفك أصلا وبعدين مش بكفاية ادتلك صحبتي كده بنفس راضية وأنا مش معترضة..يعني خليك جدع بقى وقولي هحطها جوه عنيا وبلاش الكلمتين إلي ينرفزو دول ) 

ودي حال صاحبة العروسة  وما خفي كان أعظم  والله