يا دبلة الخطوبة عقبالنا كلنا

صحيت النهارده على تليفون عايدة صحبتي بتقولي ان فاتحتها اتقرت امبارح ..طبعا افتكرته مقلب كالعادة بس فرحت وطايرة من فرحتي ان المرة دي بجد ..اخيراااااااااااااااااااااااااااااااا نحس شلتنا بدأ يتفك واحده واحده ..انا مبسوطة اوي ونفسي ال 10 ايام يعدو بسرعه عشان نحضر شبكتها ..فرحت اوي ان كنت اول واحده تعرف الخبر 
كده 3 عصافير مننا طارو فاضل 3 مممم لأ اربعه  انا وسمر وهبه و ايناس 
اول عصفورة طارت كانت ايمان ودي بقى طارت بسرعه ع السعودية بعد ما اتخرجنا ع طول 
والعصفورة التانيه كانت سموره الي كلها سنة ان شاء الله ويتغير محل ااقامتها ف البطاقه من الدقهلية الى الغربية وهنبقى جيران :)
دودو بقى هي التالته ودي قررت تطير ع الكويت 
ديما المسافات بتبعدني عن اصحابي كل واحده مننا في محافظه غير التانيه ودلوقت كل واحده مننا هتبقى في دوله غير التانيه 
بس  بحمد ربنا اننا لسهمع بعض وبنسأل على بعض
انا وسمر وهبه بنحلم اننا نسكن في مكان واحد ..كان ده حلم ايام ماكنا في الجامعه وبعد الجامعه اتحقق لما قعدنا سنة مع بعض في مكان عشان الدراسات العليا 
هبه ننفسها اننا نتجوز ونسكن ف القاهرة ونكون جنب بعض ونشتغل في مكان واحد هبه عندها امل ان انا وهي وسمر نتجوز 3 اخوات هههههههه او نتجوز احنا التلاته واحد المهم نفضل مع بعض هههههههه 
يارب متحرمنيش من صحابي ..الاصحاب الاصحاب يعني الاصحاب الي بجد ..وابعد عني يارب الاصحاب الي مش اصحاب ..ومتعلقش قلبي باصحاب ميستهلوش يارب