خليك على قد حلمي وان توهت منك ماتوهش مني
خليك طيب وحنين وقلبك حاضني ومحسسني بالأمان
خليك قريب أوي مني ومتوهش في زحمه أحلامي
عارف ؟!
البورتريه اللي في درج مكتبي
رسمة الشاب الحليوه أبو دقن خفيفة ونضاره
المكتوب تحتيها الاسم مجهول والسن مجهول
والقلب مشغول بهوايا
دي صورتك أنت
رسمتهالك يوم ما طليت من شباك أحلامي وشوفتك
إحساسي قالي هو ده فارس أحلامي
ورسمتك كده بنفس ملامحك
ومن يوميها وأنت مش مفارق خيالي
لسه مستغرب من كلامي ؟
طب أقولك سر ؟!
عارف لما تحس بالبرد وإحنا في عز الحر؟!
كان ده إحساس يوم ما قابلتك صدفه في حلمي ومتكلمناش
حسيت بقلبي بيرتعش جوايا وعاوز يخرج مني
ويقول بعلو صوته أنا حر
كان نفسي ساعتها أقولك حبيتك بس اتكسفت ومقولتهاش
ومن يوميها وأنا بحلم باليوم اللي هقابلك فيه
عشان أقولك أسرار كتير
بس اليوم ده لسه مجاش
وفضلت أنت مجرد حلم
21-5-2011
No comments:
Post a Comment