موقف صعب واحساس اصعب

حاسة اني عاملة زي الطفلة الصغيرة الخيبانة مش واحدة خلاص في شهر 7 هيبقى عندها 22 سنه

النهاردة كنت راجعة من القاهرة مرديتش اسافر يوم الخميس بالليل وقولت اسافر الجمعه وكان معايا تهمة كبيرة اوي وانا في المترو معرفش ليه جه في بالي لو السلم طلع متعطل مثلا هطلع بالتهمة دي ازاي وفعلا نزلت والي حسيته حصل طلعت على واحد تاني اعدت اقول يارب ده يطلعني على الباب الي بخرج منه عشان ملفش بيها كتير حطيت الشنطة على السلمة الي قدامي ووقفت انا تحت ..بعد كده في واحدة شايلة طفل صغير وقفت جنبي اوقبلي بسلمة مش فاكرة المهم الست دي كانت شايله شنطه وداخت ووقعت ووقع فوقها ابنها الصغير انا شوفت ابنها اتخضيت عليه اوي كان كل همي اني اشيل الولد لان هي وقعت ووقعت وراها الناس ..جيت اشيلة شنطت ايدي وقعت عليه وشنطتي وقعت عليا وفضلت ماسكة نفسي عشان مقعش على الولد الصغير وكنت خايفه يجراله حاجه والي فوق بقى تحت وكل السلم بقى فوق بعضه بسبب الست الي وقعت والولد انا مش عارفه اشيله واعده اقولهم حد يجيب الولد الصغير ..المهم الحمدلله ووقفوا السلم وجه شاب شال والولد وراح واحد اخد شنطتي فاكرها شنطت الست الي وقعت طلعت انا معرفش طلعت ازاي اعصابي ادمرت قولتله لوسمحت دي شنطتي ..سابها وشال شنطة الست هي مشيت وبقت كويسه هي وابنها وانا الي تعبت وقفت دايخه جدا وحاسة اني هيغمي عليا ساندة على الحيطة وحاطة ايدي على قلبي ...قلبي كان بيدق جامد جدا وبسرعة اوي جت واحدة وقفت جنبي هي والشاب الي شال الولد وطبطبت عليا وقالتي حبيتي انتي كان قصدك خير..وانا بقى اتفتحت في العياط والله انا خفت ع الولد الصغير واتخضيت عليه ومعرفتش اشيله .اعدت تهدي فيا وانا قلبي خلاص هينخلغ مني بيدق بسرعه جدااااااا ولما الشاب ده سالها في ايه قالته هي اتخضت بس عشان الولد اخدت شنطتي وصلني وركبت وجيت اول ماما شافتني اتخضت سالتني مالي فضلت مش قادرة اتكلم ولا عارفة انطق بابا سالني عامله ايه قولتله الحمد لله وايه اخرك كده سكت برده ماما سالتني ليه جايبة الشنطة دي متعرفش اني لاميت كل حاجتي وجبتها وبابا اعد يلوم فيا ويقولي قولتلك لما تكون معاكي شنطة زي دي ابعتلك عربية تجيبك من قدام البيت كان فاهم اني تعبانه عشان شايله الشنطة اعدت افهمه ان المشكلة مش في الشنطة ... في الولد الصغير الي ..واعدت انهنه تاني ولحد دلوقتي حاسة اني اعصابي مدمرة وبردانة اوي ولابسة تقيل اوي مع انهم بيقولوا الجو حر....نفسي اعرف ابقى زي الناس وحطت اعصابي في تلاجه انا بجد مش بستحمل اشوف المناظر دي بتخض اوي وبتعب وقبل كده ولد باب المترو قفل عليه ومع اني مشفتوش بس كنت سامعه صوته الي حد دلوقتي سمعاه ..وكمان واحدة قفل عليها الباب واعدوا يقولوا دي اتكهربت وصريخ جامد على الرصيف ..ااانا تعبانه اوي ..وتعبت اوي ومش بحب اسمع صوت عالي ولا صريخ ولاحد يزعق ..الي مش بيعرف يطلع ع السلم المتحرك ميطلعش والي مش بيعرف يركب مترو ميركبش حرام بجد انا تعبت اوي وحاسة اني قلبي وجعني جدا ..وكان قلبي حاسس ان هيحصل حاجه النهاردة وديما الي بحس بيه بيحصلي

والي كمل عليا بقى ماما قالتي اني عمو شاف نتيجة التحاليل وسال عليا كتير قولت هستريح وانزل اشوف الموضوع ده عمو جالي بنفسه..قولت بس ربنا يستر..خير يا عمو

للاسف طلع عند ميكروبين اخطر من بعض ده سبب الصداع الجامد زائد الانعواج وكويس اننا عملنا التحاليل قبل العمليه لانك لو كت عملتيها كان هيسببلك اثار جانبية جامدة جدا..لازم تاخدى كورس العلاج ده ناعالج المشكله وبعدين نشوف هنعمل العمليه امتى .

بس امتحاناتي قربت وبعمل ابحاث كتير ياعمو هعمل ايه ودرجات اعمال السنة هضيع يعني السنة كلها هضيع مني

لازم تعدي في البيت وتخدى كورس العلاج في اسرع وقت انتي مش حاسة بقوة الميكروبين دول ممكن يعملوا فيكي ايه ده ميكروب خطير عليكي ده الي بيسببلك الصداع الجامد ده ومش هتعرفي تركزي ولازم تاكلي كتير جدا لان العلاج شديد وهتدوخي عشان كده حاولي تظبطي امورك وتعدى في البيت اليومين دول ولما تخلصيه نعمل تحليل تاني ونشوف ايه الاخبار

وبعد كل الحوار ده مش عارفة اعمل ايه كل حاجه جاي تقع فوق دماغي ورا بعضها الدكاترة الى واقفنلنا ع الواحدة وكل يوم بحث واعمال سنة وامتحانات وقرف و مشاكل كتير كل يوم وتعب واشعات وتحاليل وصداع مبيروحش .........الحمد لله يارب على الي تجيبه والله مابقول حاجه بس زعلانه عشان ماما زعلانه وبابا زعلان وكمان حامله الهم ونفسي يارب تكرمني السنة دي وانجح واخف بقى عشان تعبت بابا وماما اوي وماما عاملة زي لما بتزعل بتتعب اوانا الي عامله زيها لما بزعل بتعب يارب عدي الايام الي جايه على خير