في حاجاتي القديمه

في حاجات ساعات بتكون صغيرة وملهاش في نظر كتير أي قيمة
بس عندي أنا ليها قيمة أصلي بحب أوي حاجاتي القديمة
في الصندوق ده اتوجراف مكتوب فيه كلمات بتضحكني وساعات تبكيني
كتبوها ناس بعدوا عن حياتي وناس لسه فيها
في حاجاتي القديمة صورة جمعتني أنا وصحابي بتفكرني بذكرياتنا الجميلة
في حاجاتي القديمة في كتاب شعر لنزار قباني واحد تاني لفاروق جويده
وقصاقيص من جرايد قديمة
في حاجاتي القديمة دورت ليك على جواب في يوم بعتهولي ولا صورة ليك
أو أي حاجه جمعتني بيك ولا تذاكر يفكرني بأيامنا القديمة
بس غريبة ملقتش ليك أي حاجه في حاجاتي القديمة
مع انك كان ليك في حياتي حاجات كتيرة
ولا قتني رافضة افتكر أي حاجه تفكرني بيك أو أي ذكرى حزينة
بس غصب عني نزلت دمعة من عيني على أيامنا القديمة
كانت فعلا أيام جميله كنت لسه صغيرة كنت حتى لسه مفكتش الضفيرة
دموعي دي ماهيش ندم على إلي راح ولا حنين بالرجوع ليه
دموعي دي ..صدقني مش حزينة
دي دموع فرح برجوعي لنفسي تاني بعد سنين الم وحيرة
ودلوقت هقفل صندوقي على حاجاتي القديمة
يمكن في يوم ارجعلها تاني ما هي عادة قديمة
أصلي بحب أوي حاجاتي القديمة
وبحبك أنت كمان بس طبعا مش زي زمان
يمكن حبيتك في يوم واتعذبت في بعادك سنين
وقتلني الحنين
واشتقت يوم للرجوع وفضل قلبي موجوع
مش قادر يحب ولا قادر يبطل دموع
بس أنا قلبي دلوقتى عمره من عمر الزهور
طاير في السما ويا الطيور
ما خلاص داوى جناحه المكسور
وسامحتك من زمان من يوم ما سيبتنى
عشان غصب عنك زي ما قولتلي
منا قلبي لسه طيب من يوم ما عرفتني
وبلاش تبكي قدامي على أيامنا القديمة
لا هي هترجع لينا تاني ولا إحنا هنرجع ليها
وده مش عيب فينا دا العيب كان فيها